MERCA SÓ O QUE PRECISES

Estímase que arredor dun terzo da comida que mercamos vai ao lixo, e estamos a falar de algo necesario como a comida, mais é un dato que pode facernos pensar como consumimos calquera produto.

Que é realmente necesario?

Planificar as compras en función do que xa temos pode axudar a axustarnos mellor para mercar só o que necesitamos.

SUFICIENTE FELICIDADE

COMO SACAR O PLÁSTICO DA TÚA VIDA E NON MORRER NO INTENTO

A verdade é que se nos paramos a pensar en todo o plástico que nos rodea no día a día, parece unha misión imposible desfacerse del. Xa non se trata só de bolsas ou envases, é moi difícil atopar algo que non teña compoñentes plástico. Está por todas as partes: na roupa, os cosméticos, cremas, produtos de hixiene, electrodomésticos, goma de mascar... mirar ao noso redor e atopar tres cousas sen plástico é todo un reto. A redución do plástico é fundamental, dado que é o maior contaminante no océano, pero debemos afrontar o reto paso a paso.

Os efectos máis nocivos son os causados polo plástico dun só uso, apenas unha curta vida útil (que ás veces pode ser duns minutos) e centos de anos para desintegrarse en microplásticos na natureza que contaminan o medio. A chave é non agobiarse e tentar retirar esas cousas que, se nos paramos a pensar, ben podemos evitar ou cambiar por outras sen demasiado esforzo.

As seguintes páxinas que vos deixamos aquí poden darvos boas ideas e pautas para este desafío.

APOSTA POR PRODUTOS ECOLÓXICOS

Os produtos ecolóxicos son obtidos de forma natural e respectuosa co medio ambiente. Non usan pesticidas, antibióticos nin outros químicos na súa produción. Tamén deben cumprir unha serie de condicións (que se avalían e controlan anualmente) para garantir as medidas de benestar animal e respecto pola natureza.
Entón, ao consumir estes produtos:

  • Somos cómplices de prácticas que respectan a natureza, que promoven a diversidade de cultivos e evitan a contaminación por pesticidas e outras substancias químicas.
  • Esiximos alimentos que se obtiveron tratando aos animais dun xeito máis respectuoso.
  • Adquirimos produtos máis saudables.
  • É moi probable que así estimulemos a economía local, xa que moitos destes produtos veñen de entidades próximas.

ELIXE PRODUTOS DE PROXIMIDADE E TEMPADA

O consumo de produtos locais é a elección de alimentos colleitos ou procesados nun radio máximo de 100 qm.

​Cando os eliximos:

  • Aforramos as emisións contaminantes de dióxido de carbono asociadas ao transporte a longa distancia.
  • Estamos a escoller produtos de calidade e de tempada, moitas veces tamén ecolóxicos.
  • Evitamos os envases de plástico para a súa conservación.
  • Fomentamos o desenvolvemento de pequenas entidades produtoras da comunidade a nivel local.

​Un dos criterios que nos pode axudar a seleccionar produtos de proximidade é escoller alimentos en tempada. Nas páxinas que vos deixamos a continuación podedes empregar buscadores para descubrir os peixes ou hortalizas que están en tempada cada mes.

Hortaliza en tempadaPeixe en tempada

COMERCIO XUSTO

O comercio xusto xorde como unha alternativa que busca, mediante a venda de produtos artesanais e sostibles, un intercambio comercial equitativo dirixido a favorecer ás comunidades produtoras, que son sectores ameazados pola pobreza e a desigualdade.

Cando escollemos produtos de comercio xusto:

  • ​Estamos a dar outra oportunidade e un xeito de saír adiante ás poboacións máis desfavorecidas, cuxas condicións de pobreza ou exclusión dificultan moito un presente e futuro dignos.
  • Esiximos produtos que garanten un prezo e unha comercialización xusta para todas as partes, produtoras e consumidoras.
  • Mercamos produtos elaborados de xeito respectuoso coa natureza.
  • Somos cómplices dunha rede comercial que loita contra a explotación infantil, defendendo a igualdade de xénero e unhas condicións laborais dignas.

 

QUE É O COMERCIO XUSTO