Fondos rochosos a máis de 20 metros

Outro mundo

A maioría das veces mergullamos en fondos con pouca profundidade, xa que as características das aguas gallegas (onde os afloramentos de augas cargadas de nutrientes reducen a visibilidade e a cantidade de luz que chega a cotas máis profundas) fan que nos primeiros 20 metros se concentre gran parte da vida mariña.

Pero cando decidimos adentrarnos algo máis abaixo e superamos os 20-25 metros de profundidade, as paisaxes cambian por completo. As algas, omnipresentes cando estamos a menos profundidade, aquí xa non dispoñen da luz suficiente para facer a fotosíntese e deixan paso a formas de vida animal que recobren as rochas. É o reino das esponxas, gorgonias, anemones, briozoos... que amosan formas e cores que só podemos atopar nestas cotas profundas.

A pesar de ser a parte menos visitada dos fondos galegos, as paisaxes cheas de cores que podemos atopar nestas profundidades son sumamente interesantes e permítennos admirar algúns dos animais máis chamativos e exclusivos destas augas.

Un dos animais de pequeno tamaño que máis amplamente atoparemos sobre as rochas a estas profundidades son as coloridas anemones xoia (Corynactis viridis) que, con apenas un centímetro de diámetro, cubren rochas enteiras tinguindoas de diferentes cores.

Os hidrozoos tamén atopan o seu espazo nas profundidades. Pese a ser moi descoñecidos, estes pequenos animais son abondosos e, en ocasións, adquiren curiosas formas, como as plumas que forman os fentos de mar (Gymnangium montagui).

Ao igual que acontece coas anemones xoia e os fentos de mar, os dedos vermellos (Alcyonium glomeratum) tamén poden aparecer a menores profundidades, pero son máis abondosos a partir dos 20 m. Na foto podemos apreciar como cambia o seu aspecto según os pólipos estean estendidos ou retraídos.

Pero hai animais que só fan acto de presencia a estas profundidades, como sucede con varias especies de esponxas. Unha das máis chamativas que podemos encontrar nestas paisaxes é a esponxa tubo amarela (Tedania urgorri)

Para atopar grandes exemplares de rosa de mar (Pentapora foliacea) tamén teremos que somerxernos a estas cotas. Nas súas láminas non é estraño encontrar pequenos animais buscando refuxio e, mesmo, peixes que fan alí a posta de ovos.

Mais, sen dúbida, na ausencia das algas, as grandes dominadoras destas paisaxes son as gorgonias. Estes animais con forma de abanos de cores forman vistosos xardíns multicolor a partir dos 20 metros, onde destacan a gorgonia morada (Leptogorgia sarmentosa), a gorgonia branca (Eunicella verrucosa) e a gorgonia amarela (Paramuricea grayi).

As lesmas de mar tampouco faltan a súa cita nestas profundidades. Como algúns dos seus alimentos favoritos son as esponxas e os hidrozoos, a abundancia destas especies nestes fondos convírteos en lugares indicados para atopar lesmas. Na foto vemos a lesma de puntos brancos (Cadlina laevis), especialmente abondosa nas profundidades.

As rochas están completamente cubertas de diferentes formas de vida que, se ben poderían parecer plantas ou algas, son animais. Entre eles líbranse silenciosas batallas por ocupar o escaso espazo dispoñible.

Por se faltasen cores, para engadir o toque definitivo está a estrela vermella (Echinaster sepositus), a máis numerosa nestas paisaxes e que poderemos atopar acomodada sobre grandes esponxas ou enganchada nas gorgonias.

Polo xeral, a estas profundidades observamos menos variedade e cantidade de peixes, pero certas especies son relativamente habituais como o tiburón melgacho o algunas especies de escarapote (Scorpaena porcus), como o da foto.