Os mógaros son semellantes aos lorchos, aínda que teñen dúas aletas dorsais (no canto dunha soa) claramente diferenciadas. Tampouco teñen tentáculos na cabeza e a boca inclínase cara abaixo. A cabeza é ancha e aplanada, cos ollos grandes e xuntos, e teñen moitas papilas (apenas visibles) repartidas polas meixelas.
Algúns de pequeno tamaño son nadadores, coma o lorchiño, moi abundante en Galicia formando grandes bancos. Pero a maioría deles viven nas fendas das rochas e nos fondos areosos.
É unha das familias de peixes máis numerosas, pero aquí só recollemos algunhas das máis comúns na costa galega.