Pradarías de zostera

Alfombras verdes baixo o mar

A zostera é unha planta mariña que medra nos fondos de area formando mestas alfombras cheas de vida. Pero a súa importancia vai máis alá de ser un lugar de refuxo e busca de alimento para multitude de especies. Estas plantas son quen de captar dióxido de carbono, liberar osíxeno e actúan como unha barrera protectora para a costa frente os temporais e o puxar do mar, xa que amainan o seu impacto.

Aquí viven formas de vida do máis chamativa, como os cabalos, as lebres de mar ou as agullas bravas.

As paisaxes creadas polas plantas de zostera (Zostera marina) son frondosas e chamativas, como oasis no medio das chairas de area. Veñen sendo o equivalente no atlántco á Posidonia mediterranea , xa que ambas son moi semellantes.

Moitos predadores saben que nestes lugares poden atopar alimento, polo que adoitan frecuentar as pradarías. Un habitual é o choco (Sepia officinalis) , ao que lle encanta capturar pequenos peixes. Pero non é o único: melgachos, polbos ou raias tamén visitan a zostera.

As súas follas acintadas teñen un centímetro de ancho e poden superar o metro de lonxitude. Rematan en puntas ovaladas que as diferencian de outras especies e son a superficie perfecta para pequenos invertebrados reptadores como as lesmas de mar ou os caramuxos.

Un dos peixes máis chamativos que viven nestas pradarías son os cabalos de mar. En Galicia podemos atopar dúas especies diferentes e ambas gostan de vivir entre estas follas. O cabalo de mar común ou de fociño curto (Hippocampus hippocampus) é o menos común dos dous, en realidade. Presenta un menor tamaño ca a outra especie e non adoita ter filamentos cutáneos.

A outra especie presente nas nosas augas é o cabalo de mar de fociño longo (Hippocampus guttulatus), de maior tamaño ca o cabalo común é con filamentos cutáneos que lle dan un aspecto moi particular. Os cabalos poden cambiar as cores do seu corpo para mellorar a súa camuflaxe.

A agulla brava (Syngnathus acus) tamén habita estas paisaxes. É parente dos cabalos de mar, pero co corpo en forma de serpe. Agullas e cabalos pertencen aos signátidos, un grupo de peixes que teñen a queixada fusionada e fixa, polo que para alimentarse empregan o seu fociño succionando ás pequenas presas da columna de auga.

Son moitos os tipos de caramuxos que viven sobre as follas de zostera. Algúns mesmo fan as súas postas de ovos sobre elas. Entre estes, destaca o trompo (Calliostoma zizyphinum), un dos que acada maior tamaño.

Outra función importante destas paisaxes é que atraen a os xuvenis de diferentes especies de peixes. Aquí, estes pequechos nadadores atopan alimento e poden refuxiarse entre as follas cando chegan os predadores. É por iso que sempre se di que as pardarías de zostera actúan como gardarías submarinas.

Mais a zostera tamén é o escenario onde atopar animais máis estraños, e entre eles destaca a lebre de mar ou borracha (Aplysia punctata). Este curioso molusco é como un caracol xigante sen cuncha e adoita facer equilibrismos sobre as follas destas plantas.