Os muxes, munxes ou muxos viven formando grupos en multitude de hábitats diferentes, podemos atopalos nas praias, peiraos, rompentes... case sempre a pouca profundidade. Fácil de ver e recoñecer polo seu corpo prateado, brillante e escamado cunha ampla boca. A súa dieta é moi variada, comen algas e detritos, chegando a tolerar un certo grao de contaminación, polo que ás veces verémolos comer en embarcadoiros de auga sucia. Isto fai que xogue un papel moi importante como limpador de augas (coma todos os detritívoros).
O seu corpo é alongado e musculoso, con grandes escamas ben marcadas e sen liña lateral visible. A parte dorsal presenta un ton prateado que se aclara e branquea na zona ventral. A cabeza normalmente é ancha e aplanada, cunha boca pequena con labios grosos (especialmente o superior) e os ollos bastante separados un do outro. Na ría hai cinco especies diferentes, moi difíciles de distinguir a simple vista.