Logo de colonizar con éxito o medio terrestre, algunhas plantas decidiron volver ás súas orixes e regresar ao mar. As plantas mariñas teñen unha interesante historia evolutiva porque, aínda que polo seu aspecto lembren ás algas, están ben lonxe delas. A vida vexetal xorde no mar, primeiro aparecen as algas vermellas, seguidas das verdes e, finalmente, as algas pardas. Entón comeza a vida das plantas terrestres, a medida que os musgos evolucionan a partir das algas verdes e evolucionan ata chegar ás plantas superiores, as fanerógamas, que son aquelas que teñen froitos e flores. Nun momento dado, alá pola época dos grandes dinosauros, algunhas destas plantas superiores deciden volver vivir no mar e aparecen as pradarías de fanerógamas mariñas.
Esta volta ás augas salgadas ten importantes vantaxes. As plantas dispoñen de raíces verdadeiras, polo que son capaces de instalarse en sedimentos brandos como a area, onde as algas non poden (os seus rizomas, o equivalente ás raíces das plantas, non son o suficientemente longos e fortes e precisan de superficies duras como as rochas para agarrarse). Deste xeito, as plantas levaron a cabo unha gran colonización , estendéndose nos fondos de area e cubríndoos coas súas verdes pradarías.